د اسمانونو ټيکداران

د برات شپه، او د اسمانونو ټيکداران!

 

    

نه د برات شپه شته او نه خدای تعالی ج په اسمانونو کښې ګرځي راګرځي !

     

زمونږ په کلي کې یوه ډله خلک دي، هغو په ډیرو عجیبه روايتونو ایمان راوړې دی، هغو ته خدای تعالی ج داسې ښکاري لکه انسان (نعوذ بالله ثم نعوذ بالله) هغو د خدای تعالی ج له قدرتونو څخه نه دي خبر. هغو د څښتن تعالی ج څخه (ثم نعوذ بالله ثم نعوذ بالله) د باړې‌بس جوړ کړې دی چې غونډ کال، شپه، او ورځ په ځمکه او اسمانونو کې ګرځي راګرځي. یوه ډله يي وايي اوم اسمان کې دی، بله ډله يي د شپږم خبره کوي، پرون زما یوه کوچې اشنا د اول اسمان خبره کوله. چون زه ساده او شډل وم، او هغه کوچې وو، د دواړو څه ښه ګډوډ مجلس وو او څه اوتې بوتې مو سره ويلې، هر څه مو سره مکس کړل لکه د پلي‌سوخته ګډوډ اچار. ډیر مې ورته وويل چې وا هلکه دا د اول اسمان او د څلورم اسمان د (ټریول ایجنسي) د چا سره نشته، (ناسا) لا تر اوسه هم ورپسې ګرځي چې اسمان يانې څه، له دې خبرو تیر شه. ویل يي ما په غیبو ایمان راوړي دې، ته هم زما په څیر په غیبو ایمان راوړه. ما ورته وویل یاره زه خو داسې نه شم کولې چې هره خبره او هر کرامت دی غیب وګڼم. زه خو په خدای تعالی ج داسې باور لرمه لکه څرنګه چې یي د هغه جل‌جلا‌له کتاب وايي. مثلا:

   

— اول: دغه الله ضرورت نلري چې کوم خاص اسمان ته راشي، یا د برات په شپه کومې خاصې ځمکې ته راشي، یا د کوم خاص دین خلکو ته راشي، هغه د ټولو مخلوقاتو رب دی، ځکه هغه وايي مونږ مخلوقات چې هرچیرې یو، وو، یاستو، او وو نو هغه جل‌جلا‌له زمونږ سره دی.

   

هُوَ ٱلَّذِى خَلَقَ ٱلسَّمَـٰوَٰتِ وَٱلْأَرْضَ فِى سِتَّةِ أَيَّامٍۢ ثُمَّ ٱسْتَوَىٰ عَلَى ٱلْعَرْشِ ۚ يَعْلَمُ مَا يَلِجُ فِى ٱلْأَرْضِ وَمَا يَخْرُجُ مِنْهَا وَمَا يَنزِلُ مِنَ ٱلسَّمَآءِ وَمَا يَعْرُجُ فِيهَا ۖ وَهُوَ مَعَكُمْ أَيْنَ مَا كُنتُمْ ۚ وَٱللَّهُ بِمَا تَعْمَلُونَ بَصِيرٌ. ترجمه: دى هغه ذات دى چې اسمانونه او ځمكه يې په شپږو ورځو كې پیدا كړي دي، بیا دى په عرش باندې مستوي شو، دى عالم دى په هر شي چې په ځمكه كې ننوځي او په هر هغه شي چې له دې نه راوځي او په هر هغه شي چې له اسمانه راكوزېږي او په هر هغه شي چې په پورته پورته خېژي او👈 دغه الله (د خپل شان مطابق) له تاسو سره دى، هر چېرې چې تاسو یاستئ👉 او الله په هغو كارونو باندې چې تاسو يې كوئ، ښه لیدونكى دى.

     

یادونه: شپږ ورځې داسې نه دي لکه زمونږ د کلي اخـ.ـوند صیـ.ـب چې يي وايي، هغه خپلې ورځې بیرته په قرانکریم کې واضحه کړي دي، چې دا زمونږ د هغې په څير په زرها او لکهاوو ورځې ترینه جوړیږی. استوا هم دغسې نه ده لکه دا زمونږ کلي د جومات اخـ.ـوند صیـ.ـب چې يي وايي چې چوکۍ ده، تخت دې او ملایکي يي راکاږي. او (نعوذ بالله ثم نعوذ بالله) اله شاه امد او بالا امد دغه او... داسې روايتونه او مسایل ماته د کارتوني فلم یوه برخه ښکاري. که تاسو عزیزان په قرانکریم کې بیرته د استوا مانا ولټوئ سترګې به مو له اوښکو څخه ډکي شي.

      

— دویم: خدای تعالی ج په عرش، اسمان، جومات، مکه، مدینه او کوم خاص ځای کې نه وي، بلکې هغه تل زمونږ سره وي، دی، او مونږ ته زمونږ د مرۍ یا د ورمیږ، یا د څټ د رګونو څخه هم ډیر نیږدې دی. 

     

وَلَقَدْ خَلَقْنَا ٱلْإِنسَـٰنَ وَنَعْلَمُ مَا تُوَسْوِسُ بِهِۦ نَفْسُهُۥ ۖ وَنَحْنُ أَقْرَبُ إِلَيْهِ مِنْ حَبْلِ ٱلْوَرِيدِ. ترجمه: او یقینًا یقینًا مونږه دا انسان پیدا كړى دى، په داسې حال كې چې مونږ په هغه څه پوهېږو چې د ده نفس په هغه سره وسوسه (او خطره) كوي او 👈مونږ ده ته (د ده) د ورمېږ له رګ څخه هم ډير زیات نژدې یو👉.

      

— دریم: هغه نه د جمعې په شپه اوم اسمان له راځي، نه په بله کومه نیمه شپه لاندې اسمان ته راځي، او نه لا تر دې دمه کوم اخـ.ـوند صیـ.ـب یا پیغمبر اول او اوم اسمان چاته معرفي کړې دی، هغه نه د برات په شپه راځي، او نه کوم بل کال لاندې راځي چې ستاسو عمرونه او رزقونه ولیکي، بلکې د هغه بادشاهي تل په ځمکه او اسمانونو وي، او هغه تل زمونږ سره وي 👈او دا هر څه د هغه جل‌جلا‌له د علم په واسطه يو جوړ سیسټم روان کړي دي👉، او دغه جوړ سیستم ته په قرآنکريم کې د (کتاب، مکتوب او کتب) لفظ کارول شوې دی.

   

وَهُوَ ٱلَّذِى فِى ٱلسَّمَآءِ إِلَـٰهٌۭ وَفِى ٱلْأَرْضِ إِلَـٰهٌۭ ۚ وَهُوَ ٱلْحَكِيمُ ٱلْعَلِيمُ. ترجمه: او همدا هغه ذات دى چې په اسمان كې معبود (اله) دى او👈 په ځمكه كې (هم) معبود (اله) دى👉👉، او هم دى ډېر حكمت والا، ښه پوه دى.

   

— څلورم: د څښتن تعالی ج د مشرق او د مغرب اندازه لا تر اوسه نه ده مالومه، په لوي لاس د څښتن تعالی ج کائنات د خپلو وړو فکرونو په اندازه مه واړه کوئ، کائنات لا چا تر دې دمه نه دي ګز کړي، اسمانونه لا تر دې دمه نه دي مالوم، انسان لا تر اوسه د پوهې هغه مرتبې ته نه دې رسیدلی چې هر څه روښآنه کړي، مشرق کې هم هماغه واحد ذات دې او په مغرب کې هم هماغه لوي جل‌جلا‌له ذات دې. 

   

وَلِلَّهِ ٱلْمَشْرِقُ وَٱلْمَغْرِبُ ۚ فَأَيْنَمَا تُوَلُّوا۟ فَثَمَّ وَجْهُ ٱللَّهِ ۚ إِنَّ ٱللَّهَ وَٰسِعٌ عَلِيمٌۭ. ترجمه: او خاص د الله لپاره مشرق او مغرب دى، نو 👈كوم طرف ته چې تاسو مخ كوئ، نو هلته د الله مخ (رو، رخ، طرف) دى،👉 بېشكه الله ډېر فراخۍ والا، او ښه پوهه دى.

    

— پنځم او تر ټولو مهمه خبره: د مسلمانانو یو غټه ډله په خپلو فقهو او روايتونو کې خدای تعالی ج داسې ګڼي (نعوذ بالله ثم نعوذ بالله) بالله لکه انسان، لاسونه يي ورکړي، پخښي يي هم ورکړي دي، په یوه روايت کې خو يي ترینه بې ږیرې ځوان جوړ کړې دی، بل روايت کې يي سرې څپلۍ په پخښو وي، بل روايت کې يي د ټایټانک دهلک په څیر سره ویښتان وي. بس (نعوذ بالله ثم نعوذ بالله) هر چا چې څه لیدلي خپل خدای يي ترینه جوړ کړې دی، او د يوه ناسم روايت پر مټ يې د شرک یوه ستره دروازه پرانیستلې ده. 

    

پوهیږم چې تاسو به اوس بیا وايي چې دا په لومړي او دویم کمینټ کښې هغه د بي بي عایشي حدیث او د علي ابن طالب حدیث په کوم کښڅې چې وایی په شعبان کې څښتن تعالی ج د ځمکې اسمان ته راکوزیږی په هغه کښې څه وايي.

د چڼي کور دې له غنمو ډک شه چې د اخـ.ـوند صیـ.ـب په امـ.ـارت کښې له ولږي مړ نه شي، هیڅ هم نه وایم، (خو زه یي نه منم، او که تاسو يي منئ نو ستاسو د باور، روايت او عقیدې خورا ډير احترام کومه). کليوالو! مونږ د چا په عقیده کې کار نلرو، مونږ د یهودي، هندو، سیک، عیسوي، بې دینه او هر انسان سره کښینو. او د هغو سره د خپلې عقیدي او خپل خدای په اړه خبرې هم کوو. مونږ انسانانو سره د هغو د عقیدې او باور په بنیاد دوستي نه کوو، بلکې د هغو سره د هغو د انسانیت په بنا دوستي کوو. (مونږ د الولاء والبراء په تیورۍ چې د یوې خاصې ډلې، دين یا مذهب په کنټرول او خدمت کې وي هیڅ باور پرې نلرو). مونږ روايتونه منو، خو دغه شان روايتونه چې انسان شرک ته ورسوي، انسان کوپر ته ورسوي، خدای تعالی ج د انسان مرتبې ته راښکته کړي، يو سوپر مین ترینه جوړ کړې چې په اسمانونو يي وګرځوي. دا د ماشومانو خبرې ښکاري، حتی که په روايتونو کې هم وي خو د سادګانو کليوالو خبرې ښکاري، او حتی که د ځینې مفسرینو خبرې هم وي، خو د ناپوهانو خبرې ښکاري، او که حتی زمونږ د کلي د فقهاوو خبرې هم وي. ځکه چې څښتن تعالی ج ددغسې ټولو روايتونو او فقهي خبرو څخه ډیر زيات لوي او لوړ ذات دی. جل‌جلا‌له.

   

خدای تعالی ج دې وکړي چې چڼی او اخـ.ـوند صیـ.ـب په دې خبره خفه شوي نه يې، بس دومره ورته وایم، قران د څښتن تعالی ج کتاب دې، او ددې مقالې هر یو لوستونکې ته راغلې دی، نو لازمه نه ده چې د یوه اخـ.ـوند صیـ.ـب ترجمه راواخلي او خپل ځان ته پرې د شرک، کوږ باورو، ظلم، ارتداد او د الحاد لپاره برائت ورکړي، ځکه دغه اخـ.ـوند صیـ.ـب چې نن په خپله ترجمه تاسو له سمې لارې کږوي، ستاسو څخه وړاندې دغه اخـ.ـوند صیـ.ـب هم د چا په خبره، روايت او ترجمې سره هم کوږ شوي دی. د څښتن تعالی ج کتاب يوازې په خپل فکر او خپلي مطالعې سره وویاست، او خپله لار پخپله پیدا کړئ، نه زما د (ګناهګار، بې سواده او بې پوهې شډل شخص) په خوله او نه د بل په کږو ترجمو، روايتونو، تفسیرونو، زوړ فکر او زړو کتابونو سره.

     

وا کليواله، دا خدای ستا خدای دی، نو ته باید نه د ملحدینو، نه د اخـ.ـوندانو، نه د ترویستفکره مفتیانو، یا زمونږ د مؤمنینو او یا د بل چا په خبرو غلط نه شې، ته باید د خپل خدای سمه لاره په خپلو سترګو او په خپل فکر سره پیدا کړې، او وروره ډیر زیات پام ګوره چې دا کار کوم اخـ.ـوند صیـ.ـب او د روايتونو کوم ملګري ته پرینږدی، هسی نه چې بیا په هغه سخته ورځ کښې وايي چې: يَٰوَيْلَتَىٰ لَيْتَنِى لَمْ أَتَّخِذْ فُلَانًا خَلِيلًا (الفرقان - 28). ترجمه: اى (زما هلاكته، زما عذابه، زما خرابۍ) ! كاشكې چې ما خو فلانكى سړى په دوستۍ او ملګرتیا سره نه واى نيولى.

       

— ادامه لري….

   

وَمَا عَلَيْنَآ إِلَّا ٱلْبَلَـٰغُ ٱلْمُبِينُ. زما مسؤولیت یوازې پیغام رسول وو. (او تاسو هم د حق لارې د پیدا کولو لپاره په څیړنې او پلټنې سره خپل مسؤلیت ادا کړئ).  

ستاسو په درد دردمند، ستاسو خپل ورور، کلیوال، او پیر،

#پیر‌بنده‌فقیر